Libu-libong Deboto Dumagsa sa Quiapo Church para sa Palm Sunday, Simula ng Mahal na Araw
MANILA, Philippines — Dinagsa ng libu-libong mananampalatayang Katoliko ang Minor Basilica and National Shrine of Jesus Nazareno nitong Linggo, Marso 29, upang gunitain ang Palm Sunday na hudyat ng pagsisimula ng Mahal na Araw.
Maagang nagsimula ang pagdiriwang sa pamamagitan ng isang taimtim na prusisyon mula Carriedo Street patungo sa simbahan, kung saan sabay-sabay na itinataas ng mga deboto ang kanilang mga palaspas upang mabendisyunan. Ang Palm Sunday ay pag-alala sa matagumpay na pagpasok ni Hesus sa Jerusalem, isang mahalagang bahagi ng pananampalatayang Kristiyano.
Sa isinagawang mga misa, tampok ang pagbasa ng Passion Narrative na naglalahad ng mga huling araw ni Hesukristo—mula sa Kanyang paghuli, paglilitis, paghihirap, hanggang sa pagpapako sa krus. Binigyang-diin ng mga pari ang kahalagahan ng kababaang-loob at sakripisyo, na sinisimbolo ng pagsakay ni Hesus sa isang asno sa halip na kabayo.
May mga deboto ring nagmula pa sa iba’t ibang probinsya upang makiisa sa pagdiriwang. Ang ilan ay may mga personal na panata at tradisyon, tulad ng pagbisita sa tatlong kilalang simbahan tuwing Palm Sunday, kabilang ang National Shrine of Our Mother of Perpetual Help at National Shrine of Our Lady of Peace and Good Voyage.
Ayon sa pamunuan ng simbahan, may kabuuang 12 misa ang itinakda sa buong araw upang matugunan ang dami ng mga nagsisimba. Sa tala ng seguridad, libo-libo na agad ang dumalo sa mga unang misa pa lamang ng umaga.
Pinayuhan naman ng mga awtoridad ang publiko na mag-ingat sa kanilang mga gamit at magdala ng tubig dahil sa mainit na panahon.
Patuloy na inaasahan ang pagdagsa ng mga mananampalataya sa mga susunod na araw ng Semana Santa, habang pinagninilayan ng mga Katoliko ang sakripisyo at pagmamahal ni Hesukristo.
